سجاد الاشواق

اشتقت لك قولي لي اشلون ما أشتاق
وعلميني كيف لا غبتي أهدى

يا غاياتي شعري له أطوار وأذواق
كن القوافي عيس وأنا لها أحدى

يمر قاف وتكتمل لحظة إغراق
ينصب فيه العشق والقلب يندا

ويثور فكر وتسقط أوراق وأقلام
وينوض برق ويمطر الوقت صدا

ويصير بين الفكر وأشعاري عناق
ويشدني للماضي الحلو وجدا

وأنا على رجوا يجي منك ترياق
يروي خفوق اللي ظروفه له أعدا

تايه عليل ويرتجي لحظة إشفاق
يرجف وله في يوم ما فيه بردا

تاه النظر في غيبتك والفضا ضاق
وأشوف قدامي سيوفٍ تحدا

أتعبت في ميدان ميعادك الساق
ومديت لك سجاد الأشواق مدا

وكتبت لك بالدم عهدٍ وميثاق
وأهديت لك ذوب المعاليق شهدا

كم لي أقول السعد يغتاله فراق
وكم لي ازيدك قرب وتزيد بعدا

أقول لك صدك حرق قلبي إحراق
ودايم علي بدون سبه تعدى

جيتك أقول القلب للهجر ما طاق
تعال حط لسوءة الصد حدا

قلي متى شمسك تجلى للإشراق
وقلي متى يا زين للوصل نبدا

هيا على مبدأ الفضيله والأخلاق
نكتب على المبدأ وثيقه وعهدا

ونحلم ونعبر بالهناء كل الأفاق
وأهديك في ليل التباريح وردا